ابنِ أساسك صحّ.
وارفع معدّلك.

خلال أكثر من 15 سنة بالتدريس الخاص، وبعملي معلّمًا في إعداديات وثانويّات عدّة، شفت المشهد نفسه يتكرر: طالب يوصل للثانوي وهو حامل فجوات من سنين، وبصير مقتنع إنّ المشكلة فيه، مع إنّ المشكلة غالبًا إنّ الأساس ما أخذ حقّه.

الخبرة جوّا الصف علّمتني شو المدرسة قادرة تعملّه، وشو تجربة الطّالب داخل الصف. والتدريس الخاص أعطاني المساحة أرجع مع كل طالب للنقطة اللي انقطع فيها الفهم، وأبني معه من هناك بطريقة بتناسب سرعته وطريقة تفكيره. بعض الطلاب مش بحاجة شرح أكثر؛ بحاجة إنّ الشرح يبدأ من المكان الصح، أو لمنهجيّة واضحة للطالب تفهّمه كيف منتعلّم ومنكتسب المعرفة، مش بس المعلومات.

تأهيلي الأكاديمي والتربوي من جامعة حيفا، وأنا حاصل على شهادة تدريس اللغة العربية كلغة أم، وشهادة تدريس اللغة العربية المحكية كلغة ثانية. هاي المؤهلات بتعطيني أدوات مهمة، بس الشهادات لحالها ما بتعلّم حدا — اللي بيفرق فعلًا هو كيف بستخدم هالمعرفة داخل الدرس: أشرح الفكرة بطريقة واضحة، ألاحظ وين بالضبط صار الالتباس، وأغيّر طريقة الشرح إذا الطريقة الأولى ما وصلت. في فرق بين إنّك تعرف المادة، وبين إنّك تعرف كيف توصلها لطالب معيّن، بوقته وبالطريقة اللي تناسبه.

لهيك هدفي مش بس إنّ الطالب يحلّ السؤال الموجود قدّامه اليوم. هدفي إنه يفهم كيف يفكّر، يعرف من وين يبدأ، ويثق بجوابه لحاله. بالنهاية، نجاح الدرس بالنسبة إلي مش إنّه يضلّ متعلّق فيّي؛ بل إنّه يصير أكثر استقلالية وأقل حاجة إليّ.